Fantasy Blog

有點累

2006-08-14T09:26:00.000-07:00

好像真的老了很多... 近來只是多一點東西要做.. 就感覺到有點累.. 或者我還需要把身體搞好一點... 不過自從返新工以來.. 我沒多時間做運動了.. 唯有飲食應該注重多一點...

第一次渣起旗仔帶隊.. 輸波時真的原來發現有點壓力... 我想這個係一個好的練習吧.. 畢竟足球隊還是小玩意... 自己的意見不同別人時.. 真係跟又唔係.. 唔跟又唔係... 其實會明白對方所的道理... 甚至有時心裡面有點覺得跟著也可以試試.. 但是管理本身就真的很難.. 我當初想平衡一點會好一點.. 但原來大部份情況下可能都係兩頭不討好... 好像.. 是要學企硬點.. 橫掂任何情況下都有人不滿.. 原來堅持己見是管理一部份...

近來.. 心情不差啊... 新工可能給了我一點新感覺.. 好像動力多了點... 也看多點戲... Cars 真的很好看... 魔盜王我自己覺得好看.. 不過同事又好似唔係咁諗.. :P

一個月

2006-08-08T06:57:00.000-07:00

一個月了.. 返新工也有一個月了... 還是很無聊的說... 主要由聽 voice mail 同 mailing 變做得返聽 voice mail.. d 大陸銀行真係好.. 做咩都慢慢來.. 話說 hsbb 同一個 position 三日就上場了...

其實呢度有呢度好... 好多野都圍威喂.. 樣樣野都係自己一班人搞掂.. 無乜咩 supervision... 同埋... 個 group 唔大... 又唔係好多人.. 我估無幾耐就可以識到隔離 dept d 人.. 可以望下其他 position.. 都係得個望字啦.. 暫時.. 連入場劵都未有...

同事都幾好.. 好多都好 nice... 而且竟然冇乜 d 好難頂o既.. 或者行為好怪o既人... 可能個工作性質都要 talk 下. 要識得 social 下... 最怪都係阿... :x 唔講得... 我到家下最未適應都係日日七點起身.. 家下到晏畫時候都係仲好眼訓下... 我遲起身太耐了...

狼來了

2006-08-04T08:11:00.000-07:00

不知怎的.. 近來常常哼起了狼來了這首歌

世界杯

2006-05-17T06:07:00.000-07:00

起來起來起來, 今晚大家不想去街..... 四年一度世界杯又來了, 實在好急不及待. 近來各地聯賽收爐以後, 世界杯開始越來越熱, 大家開始討論了. 可能係有波賭o既關係, 今年o既世界杯可能好似比之前兩屆熱鬧左少少, 不過我總覺小時 d 世界杯開心 d, 隨左話細個無聊時會比較無乜細藝, 一個世界杯就可能係成個世界咁, 又可能舊時少波睇啦, 一個月先有無線一兩場直播, 世界杯就成個月都有波睇, 真係開心到暈. 不過家下就唔同啦, 真係殺到埋身個一兩個禮拜先會真係同人討論下.

講開細個睇世界杯, 老媽就一定會講返我六歲o既時候, 睇完一場一點o既時候, 仲叫 d 屋企人訓先, 我自己等埋第二場三點開波. 當然了, 結果都係俾人兜左去訓. 那是八二年世界杯的事了... 跟住八六, 九零世界杯大個 d 囉, 我到家下都仲好鬼記得. 八六年世界杯法國對巴西的夢幻八強賽啦, 上帝之手啦, 我看中的丹麥俾西班牙狂數, 仲有我老豆買左第一部錄影機, 同話阿媽唔起身睇決賽戇居, 跟住俾佢鬧左一大餐. 九零年我看中o既德國拎冠軍, 自己食麵包都要買一套集圖冊, 同 d 同學仔日換夜換, 仲有響麥記買左套世界杯的杯, 印晒 d 球隊名同國旗上去, 一套六款. 所有野都仲好記得, 你話我係咪柏金遜丫.

好.. 先響度估下今屆 d 出線球隊先
A: 德國, 哥斯達黎加
B: 英國, 瑞典
C: 科特迪瓦, 荷蘭
D: 墨西哥, 葡萄牙
E: 意大利, 捷克
F: 巴西, 澳洲
G: 法國, 多哥
H: 西班牙, 烏克蘭

回來了

2006-05-03T06:42:00.000-07:00

好耐好耐, 無寫野了. 點解咁耐唔寫? um... 我梗係唔話你聽啦，八掛... 總之, 這幾個月我就好像什麼也沒有做過似的．其實到呢一刻都係無咩想寫，只不過係有人提我，我再唔寫我可能連自己有個 blog 都唔記得左, 咁樣好似唔係幾好.

其實，這幾個月雖然什麼也沒做過，但事實是想起了我很多事情．諗起前事我的態度，同生活，對人的事．我唔係響度做什麼回顧，或者在領悟ｄ咩．只係，有點事會鈎起我一ｄ回憶，別人怎樣對待我的時候，我可能也怎樣對待過別人．返而是那種風水輪流轉的感覺，令我突然覺得自己我去了方向．點解.. 我都唔識講呀.. 總之個感覺係，無論你怎樣做，對或錯，原來你自己其實唔係咁可以控制到ｄ乜，到頭來自作自受．努力是一定要的，但沒有目標時事倍功半，很不好的感覺．

就快又來世界杯了，我可能每日都 update 下 d 戰果，講下我ｄ心水．等我響度搵返寫野o既感覺先．好多人話巴西會贏嘛，但我還是相信響歐洲打，ｄ南美隊硬係無咁好腳頭．下次先講下我ｄ心水　:D

新年到

2006-01-30T17:44:00.000-08:00

今日已經大年初三噢.. 恭喜發財!! 希望大家都身體健康, 心想事成.

而家係朝早九點幾.. 係.. 我係第一次響呢個時段寫 blog 的. 別人話朝早做野精神爽利一點的, 但係其實我一向以來都好少話朝早起身掛住做呢樣o個樣咁.. 不過朝早起身做野都係會有舒服一點o既感覺. 這個唔係前人老土o既想法, 話說是有科學根據的, 好似話係朝早唔知多左個腦多左 d 咩 hormone 咁咁.. 唔鬼識 d technical term... 其實我應該好受惠, 因為識得我耐都知其實我個人唔係好訓得到晏, 就算四五點訓都好一第朝最遲九點零十點左右就會彈起身. 而家廳仲多左一兩個人肉鬧鐘, 更加唔使旨意會訓到晏. 所以如果我朝早努力一點其實應該可以做多 d 野.

唔.. 今年這個新年是比往年更沉悶o既一個新年, 而且是意頭很不好的一個新年. 只係希望唔好o既野快 d 過, 人人都可以健康一點, 開心一點.

演唱會

2006-01-24T05:10:00.000-08:00

上個禮拜去看了孫燕姿演唱會, 實在我覺得很好看.

孫燕姿的唱歌很好就不在話下, 我實在覺得一個演唱會實不應該只是唱那麼簡單, 是一個實實在在的表演項目. 例如當然的會有演唱的部份, silent all these years 實在好聽到爆, 也有幾種唔同類型唔同類型的舞蹈. 而且歌曲類型也很多, 甚至新的 band sound 歌和非洲敲擊樂歌曲也很好聽, 自彈自唱更加是拿手好戲. 雖然有一半左右的歌我都未聽過, 但係o個一半歌只係會令我覺得過到黎香港 plug 的大部份只是一些較為 k 歌的, 實在佢有好多方面的o既才華, 響香港方面o既宣傳都未盡發掘.

很多人會說容祖兒唱歌很好聽, 事實証明呢幾年都係香港最 top o既歌手. 但係我還覺得一拍之下, 別人就在歌路上遠遠拋離了. 我從來唔否認佢唱歌係好聽, 但係我個 point 係佢同大部份香港歌都係.. 唱黎唱去都係差唔多o既歌. 老實說, 而家除左明日恩典, 我的驕傲,逃避你, 其他歌我都要聽好耐先講得出歌名, 因為佢 d 歌實在係首首都差唔多. 當然我明白而家佢地某程度上唔係話唱歌咁簡單, d 歌係一首首的 product, 歌手似 sales 多少少. 但係如果係咁, 佢地就只係流於 sales 的派別, 我地其實都唔使用咩 d 歌好唔好聽去形容囉, 只係你 buy 唔 buy 而已.

小風波

2006-01-19T06:30:00.000-08:00

話說我出年會沖太歲, 每年我都發現有很多人要犯太歲, 唔知係咪 d 廟要收多點陀地.. 係咪都寫 d 上去.. 又犯太歲, 又沖太歲.. 仲有 d 小型一點.. 實在好煩.. anyway, 去墊下太歲唔知係咪 work, 不過求個心安理得又何妨. 記住, 出年龍年出世的會沖太歲, 實在小心一點為上. 至於想要催吉避凶之法的, 個別找我吧. XD

不過未過年就好像太歲出來了的, 身邊實在有點是非. 其實外人總說是小事一摏, 算是局外人的我當然總覺得很小事. 但有時發生響自己身上又可能都係一樣咁執著. 其實我曾經是很不好相與的一個人(而家當然也不是太好, 只係好左少少.. 係少少!), 但係有時就只不過就是一點點執著, 只要放開一點就可以了. 簡單點的諗法就係.... "我又唔係第一日識佢, 佢係咁架啦".. 就算唔係話你放開左大量左, 但係我想都會容易接受左.

近來聽真點勞詩萊詩和化碟, 越聽越好聽, 搞得我很想買隻梁祝音樂劇來看.

派司了

2006-01-16T06:13:00.000-08:00

呵呵.. 什麼是派司...? 派司就是 pass 噢.. 小時看橋牌書學回來的.. 我.. pass 了 FRM 啊.. 真高興!

其實, 我也不知 pass 了 FRM 我可以做什麼. 只係讀左咁耐, 給了那麼多錢, 總算換來一點成就, 自我滿足而已. 而且給我一丁點 finance 的 proof, 實在自我感覺良好, 總算沒入錯行!

很多人叫我去考 CFA, 不過實在覺得自己有點不能. 而事實上我實在給 CFA 拋離了很遠很遠, 要 pickup 返對我黎講實在有點困難. 雖然我感覺好像 FRM 的試比較容易, 也擔心因此這個考試變得不太重要, 但我又覺得好難忍受 CFA 那種煎熬. 起碼要兩三年的事, 現在才讀實在很易氣餒, 況且真的開始要找點錢才是. 就算讀都讀個 CFP 好像對我工作有用一點.

丫.. 講到橋牌.. 實在又好耐冇玩囉. 不瞞你說, Bridge 才是我由細操下來的強項噢. 不看我 blog 實在唔知喱... 好野我才不會揚開.. :P 唔好 forward 我個 blog 呀.. 知唔知道!! 打 bridge 實在是我至愛, 佢唔同捉棋o既係.. bridge 除了技術, 合作性, 還要一點視野的. 視野的意義在於你要看出對方的報陣而去察看破綻. 不只是玩棋那麼只單重棋盤計算的.

放完假

2006-01-03T05:55:00.000-08:00

又過聖誕, 又過聖誕, 又新一年了. 放完假了.. 要好好的準備新一年.

有人說要整個新年大計.. 我硬係覺得係自欺欺人.. 可能係我恆心唔夠定點啦, 我總覺得好似當有 d 限死自己o既時候, 做唔到又好似好有挫折感. 唔敢俾自己壓力. 但係可能有時又冇乜壓力, 當我唔知做乜渾渾噩噩的時候, 唔會俾到自己一個警示.. 好... 今年開始應該寫返 d 野.. 要進取一點.

今日短一點.. 不過要培養返寫野.. 如果下下都要諗到咁多先寫又來一個月一篇文!

今年目標:
1. 試考晒, 無晒藉口, 今年要努力工作, 要請人!
2. 要努力做多點 COLD CALL
3. 要有多點自信 (好虛無飄渺)
4. 工作日要八點半前起床
5. 要做多點運動.. 起碼減十磅
6. 找女朋友

睇下戲

2005-12-29T07:25:00.000-08:00

原來成個月無寫 blog, 好不濟... 我應承大家遲 d 寫多 d blog 呀.. 雖然我都唔知有冇人睇.

近來看多了一點戲.. NANA, KingKong 同埋情癲大聖.. 本來我仲以為會睇多 d 架.. 不過後尾都無睇.. 今日同老世傾開, 佢又和我的大部份 friend 意見一樣, 發現我 d 電影口味好怪雞..

其實我一向都知呀.. 所以我好少跟人討論我喜歡的電影.. 其實近呢幾年我鐘意o既有麥兜菠蘿油王子啦, 哈爾啦, 天下無雙啦.. 近來睇 NANA 同情癲大聖也很好... 當然 LoTR 第二集實在是一絕.

我覺得其實我看什麼也好, 我的欣賞角度也是一樣.. 就是我想看一些我之前並沒有看得到的東東... 而且故事和意念永遠是行頭... 這個是很個人的口味... 這個我真的有點東西想說.. 近來特技片實在盛行.. 但係我就不以為然.. 我不是說特技片不好.. 特技實在大量的豐富了電影帶來的想像力.. 但無論如何它都不可以凌駕於故事... 就是一句特技應該為故事服務.. 而唔係用個故仔去就番過特技.. 好似 KingKong 咁.. 當成齣戲我可以搵到廿幾三十個反駁位o既時候. 我實在係要輾轉反側左十零廿次先睇得完齣戲. 而且那個根本性的問題已經不單止是單一事件了. 我聽了一個影評人的說話實在是很同意.. 而家全球各地的觀眾都像給 Hollywood train 了下來.. 就是好像以特技來評分. 問題在於.. 丫.. 今次大火災好播.. 下次大洪水.. 又下次就大飛船啦.. 今次來了七十個特技分.. 下次你給我六十分我當然不滿.. 你唯有整夠八十分先吸引到我. 久而久之.. 在創作上已經給特技局限了. KingKong 那些位根本為特技而特技.. 有乜奶油二十世紀仲有 d 恐龍走黎走去.. 如果我係個衰人導演.. 我寧願搵隻恐龍返去仲有價值過搵隻 KingKong 啦! 講故唔好駁故都好難忍到呢個程度.

其實無論世代怎樣變, 技術會怎樣進步也好, 欣賞事物的角度是不會變的. 如果看完沒有感動的地方, 也沒有新的角度帶出了, 我很難認同那是一齣好戲!

考完試

2005-11-29T06:21:00.000-08:00

終於考完試, 又可以放監了.

其實都考完都有個幾禮拜, 不過係懶惰才沒有寫 blog 而已.

介紹下我考個試先. 那個叫 FRM 的, 全寫是 Financial Risk Manager. 雖說是 financial, 還包括了 Operational Risk. 另外會有 market risk, credit risk, fund managment 這幾個大 topic. market risk 主要是說市場上的波動導致的 risk, 大部份也論述一些衍生功具(derivative)的 risk. Credit risk 是講定息市場因為公司或個人信譽出現問題而產生的價格波動. Fund management 就係我老本行了, 解釋基金的運作和相對上要主意的風險. 尤其係對沖基金 (Hedge Fund) , 可能不是很多人對呢樣野好熟悉的. 至於 Opoerational risk 是說整體一間公司所遇到的風險, 主要是管理公司內的人員避免有機會出現大額虧損的交易. 內容範圍很廣泛的, 我也不是懂得很多, 只讀考試的內容而已.

不過由於我本身工作對呢方面的涉及不是太多, 讀起來真的有點辛苦. 慶幸今年的考試只是觸及範圍廣, 題目的出法不是很要雕難考生, 總是對我較有利, 其實我計o個 d 數唔係好o力 :p. 其實如果今年也不及格的話, 應該是技止於此了. 我都係專心 d 努力 d 做好而家份工.

近來工作不多, 考完試之後原來要 pick up 返都唔係想像中咁易. 停左就係停左, 仲可能o徒左個大客.. 慘! 不過要盡快搞好了. 順便響度賣下告白, 我上年那個客人(friend 黎 :p)做到家下賺左 33%, 冇吹水.. 唔幫襯都介紹下 XDDD.

要做野囉.. 而家開始努力寫下報紙, 遲 d 要寫 d 勁野出黎勸服別人我係好野..

係呀.. 我實在好好野.. 你咪唔識欣賞

小星星

2005-11-07T18:09:00.000-08:00

當天應該得七歲　我想喝媽媽的汽水　
把它搶在掌心裡　大人無法迫我睡　
他跟她今天竟飲醉　我想搶的不止汽水　
輸光自尊也鬥下去　壓力大得慾望都失去　
一閃一閃小星星　開開心心的唱詩　
但為何一畢業才知　一世我也要考試
誰也好　即使愛侶都沒有必要待我好　甜辣酸苦都一樣當寶　　
誰亦會計數犧牲才得到的快樂　亦沒什麼味道　
難怪我雙協插了刀　為博他答謝也好　仍沒法開心得這樣早　
誰願欠我一世人間散步　善良人永遠天真到　做好心不信得惡報　

終於都跟他分手了　我開過的心不算少　
今天起睡得夠最重要　以後幸福亦未必敢笑　

一閃一閃小星星　簡簡單單一輩子　
就從頭到尾哼一次　忘記智商去做人都願意

萬勝節

2005-11-02T07:19:00.000-08:00

不好意思的說句, 我中三時才知道有萬勝節這回事. 之前的萬勝節我做什麼? 答案是.. 那是我老哥的生日, 每一年的十月三十一日都要返屋企吃飯.

某程度上, 就算是我中三, 我也不太知那是萬勝節. 當時我是學校的一名小同學. 跟著宿舍的師兄們說今晚會有野玩, 我都唔知做乜鬼. 跟住成班友扮下野, 四圍去問 d 老師去拎糖食. 拎完一大找糖之後呢, 我地就玩分組活動分糖, 玩贏先有得食. 到最後, 其實我食完糖我都唔知o個日係萬勝節. 好似都無耐之後問返人至知.

家下萬勝節就大搞特搞囉, 可能遲 d 萬勝節後一日會變左做假期. 不過其實呢 d 節日我就唔多有好感, 因為其實沒有什麼特別的原因慶祝或是什麼, 只是為左大玩特玩. 那些南瓜頭也不一點都不可愛. 同事說呢一 day 係可以響街癲下玩下, 撩下女仔, 又唔覺得肉酸. 唔... 說得好像很有意思似的.

生日會

2005-10-25T06:47:00.000-07:00

一到年尾, 就是好多人生日的日子.

我成個屋企, 除左我之外, 全部都是十月生日的. 不過我的同學仔又唔係咁多係十月生日. 返而十一月的就真係多到爆, 我數埋數埋淨係科大同學仔就差唔多有三份一人係十一月生日, 好恐怖. 就算中大的同學也不少. 次次生日會都有很多人生日, 很壯觀.

不過唔知點解, 我個人就唔係好話要咩大堆頭生日會. 而事實上, 我由細到大都冇乜點搞過咩生日會. 更加未諗過去咩麥記擺壽宴. 其實我都唔係話咩要低調呀, 之如此類, 但就係無 d 咁o既諗法.而家老左, 每年都有人同我慶祝下咁, 好開心. 而家先知其實有人跟自己搞下生日會係好開心o既一回事. 不單止是我而家朋友多了, 而是當世界那麼無常的時候, 很多人聚在一起跟自己吃一餐是一種很大很大的福氣, 而我真係好開心我有這種福氣. 所以我很著重每次跟人吃生日飯, 因為我要為賜予我福氣的人加油.

十二日

2005-10-01T02:57:00.000-07:00

十二日冇寫 blog 了.. 因為中間有很多時候夜晚做左其他野, 所以冇寫囉.

發生了不少事.. 不過可惜大部份都不如人意. 跟朋友的爭執令我想起很多事情. 有時候我已經唔知可以點, 像是廿多年來學回來的都不管用似的. 退一步以前是可以海闊天空, 但最後發現從來不能將東西放下. 其實說不上是什麼患難之交, 也不是心上的人, 但曾經響你失意的時候每天在你身邊出現, 還不是係咁意會話放低就放低

上星期去了長洲玩了一天, 做左好多好耐都冇做o既事. 很感動啊, 好似好年青咁. 爸媽成日話我細個去左好多地方, 但係我又唔係好記得. 淨係記得細個老豆有車o既日子, 放左工成日去深井附近 d 沙灘玩一兩粒鐘, 跟住去深井食下飯咁, 但係唔係好記得玩乜鬼. 諗諗下搞到我好鬼恨買返架車四圍玩. 不過好似除左自己, 其他野都仲未養得掂.. 點算, 不過遲 d 應該掂, 我有信心!

我幾時會生番個呢.. 唔... 唔知會點.. 不過只係見到我姪女咁, 我又唔係好睇得過眼. 阿媽話:"唔好咁, 第時你有一個都係差唔多架咋." 真係會咩? 其實我估我唔會的.. 不過, 有得生至算!

丫.. 很重要的是, 祝你身體健康!

追月夜

2005-09-19T09:52:00.000-07:00

在屯門公路上看到了一個大大的月光, 好圓好大, 感覺仲好近, 真係好開心.

今天去了龍鼓灘 bbq, 很開心. 開心的是和很久沒一起的大學同學去玩. 我曾經以為我們的友情會到此為止, 或者是年月過去了, 大學時很多的經歷也忘掉了. 大家聚在一起, 可能都係傾傾近況, 不是接觸了很深入的話題, 但那種坦然的感覺就湧回來, 一講就會講得很高興, 大家都不會避忌什麼, 畢竟是老同學了. 我還知道他們曾經拋下我去了旅行, 真慘! 因為我曾經不知可時得罪了人. :P

中秋節

2005-09-19T02:38:00.000-07:00

好啊.. 今天是中秋節..

講起中秋節, 一定要講返我細個響屋村玩的事. 細個我是住麗瑤邨的(現在也是住曉麗苑, 好像跟個麗字很有關係), 是井字型的那些居屋. 到了中秋前後, 大家已經開始很急不及待的在玩蠟燭. 玩蠟燭的方法有很多, 也不分畫夜. 不過我由於比較怕死, 又很驚熱的關係, 通常都係玩好正常o個隻, 即係響門口o個度就咁排開一字型咁長長的. 但我哥就跟其他男仔常常在玩煲蠟. 其實我都唔知煲蠟有乜咁好玩, 淨係覺得自己好似整到 d 自己有o既形狀o既蠟燭好似好型咁. 但係, 其實整完o個 d 蠟燭, 不能否認大部份都好醜樣, 尤其係我整o個 d.

當然, 高峰期就係中秋正日o個晚. 首先我地成班細路(連埋 d 街坊)會響o個晚一齊集合到, 因為o個晚通常 d 大人都會雀局. 咁我地就會開工啦.. 通常我地會做兩樣野, 第一樣就係繼續我玩開那個點蠟燭遊戲. 不過由於那晚是群體出擊, 目標當然就是把那個蠟燭排整到最長為止. 通常盡量是起碼要有井字的一邊才滿意. 最長的應該有邊半. 整完之後其實會睇下上下幾層有冇整到我地咁長, 如果有的話就諗下夠唔夠人再整長 d. 最後就搞到好似比賽咁. 另外我地會試下將 d 燈籠掛響井字中間. 方法很簡單的.. 只係用條長線綁在兩邊, 然後將燈籠掛響線上面綁出去. 通常係掛得幾多得幾多.. 而且都係用那些舊型的紙做的燈籠. 最 typical 那些, 因為o個 d 燈籠掛左先靚. 而家都仲係覺得咁.

而家我住緊間樓, 雖唔係咩豪宅. 但畢竟比我細個住的樓大左一倍, 我有自己的房間, 已經係覺得幾舒適. 可能係我要求唔高啦. 樓係靚左舒服左, 不過舊時住屋村那種生活係唔會唔記得, 尤其係o個 d 融合的氣氛, 街坊街里真係可以打成一片咁, 過時過節又有一大班細路仔玩, 真係好開心. 我想就係連我地下一代, 都唔會有咁o既生活體驗.

人的隔膜, 好像還離不開物質的擁有.

第一次

2005-09-16T01:22:00.000-07:00

剛看了朋友 mich 的 blog, 發現了這裡, 所以 reg 了一個 account 來看看.

我不知會不會以後會定期在這裡 post 文, 不過這是個開始吧. 聽了 blog 很久了, 很 out 的, 不知是什麼. 後來是看報紙知道的. 其實我很少看副刊的, 不過要看一看 blog 是什麼吧. 開始是很重要的, 我是一個不太懂得怎樣去開始的人.

朋友的 blog 寫著的東西, 說實的, 不是太有興趣. 好像是很貼時事, 我就唔同, 我奇實冇乜特別, 諗到寫乜就寫乜. 好像這個.. 上面全都是我想都冇想就打下來的東東. 所以.. 可能.. 內容係好空洞的. 我想我如果遲 d 還會響度寫 blog, 不要嫌我的文章沒有意思. 因為 blog 就是無無謂謂寫 d 野上黎俾人睇.. 係嘛?

開工了... 返屋企再寫過..